سامي المر، حيفا. بحب السفر واكتشاف ثقافات جديدة، وبعمر 19 طلعت أول رحلة طويلة كنت أعرف فيها فقط نقطة البداية، واستمرت شهرين حول دول أوروبا وفتحتلي باب لتجارب ما توقعت أخوضها. بعد إنهاء لقبي في الهندسة الصناعية والإدارة من التخنيون، قررت آخذ طريق غير تقليدي، بعيد عن الروتين، أستكشف فيه ذاتي وأسمع لصوت اللي جوّاتي. أول محطة كانت مع HomeAwe كمتطوع في جبال الألب بسويسرا لمدة خمس أشهر ،تجربة خرجت فيها من منطقة الراحة، وتعرّفت أكتر على نفسي، وفهمت قدّيش شغفي بالسفر جزء أساسي مني. السفر بالنسبة إلي مش مجرد تنقّل بين أماكن، مش "استراحة من روتين الحياة" بل وسيلة بتخليك تواجه نفسك وتفهم ذاتك أكتر. بكل بلد بوصله، بكل شخص بقابله، وبكل لحظة بعيشها، بضيف جزء جديد لهويتي. وتعلّمت إنو الشغف هو البوصلة اللي بتوجّهك لطريق النجاح حتى لو الطريق مليان تحديات ومفاجآت.